شو مهدوش،
هاو واحد موش سمباتيك، عياري، شلح، بزقليف، هابط هو و بوه م الجبل، بش يحكي معاك كلمتين خفاف نظاف
شد عندك : خطك الأحمر، أعمله على مرتك، أنت أجبن من أنك تنفذ وعيدك : كيف الباجي في التلفزة، يصف الجيش الوطني بالبهيم، و يقولو "إررر" يمشي، هانو عطاك شلبوق انت و "المؤسسة العسكرية خط أحمر" عرضتلوش في الدورة : لا! كان جاء عندك غرام شجاعة راهو تشال، منين تجيك الشجاعة يا كبدي، أنت جبان رعديد
جبان كهو..لا و كذاب زادة
كذاب! قلك شاورنا الهايكا في غلق القنوات بالبوليس! جاوبتك الهايكا انت زفزوف
إش عندنا تو، وزير أول جبان و زفزوف
نزيدك، مهدوش، أنت بهيم
الإرهابيين سي البهيم الي يقتلو في الجنود، ما قراوش في المدارس القرآنية، قراو في مكاتب و ليسيات الحداثة و الي قراوهم بلاش قمل و يعرفه يحكو سنيهم
معناها الإرهاب صناعة نضام تعليمي فاشل، يقوم سي الشباب يسكر نظام تعليمي آخر
كان موش بهامة، بالله عليكم شنية هذه! و تتسمى سلكتها، إخترتلك بهامة موش سوء نية
نزيدو جوستمون، جبان، زفزوف و بهيم.. إش قعد : مجرم
المجرم يا سي المجرم هو الخارج عن القانون، و انت بخروجك على الدستور التونسي و مخالفتك عديد الفصول، تتسمى مجرم، حتى كانك سمباتيك، تسميتك لا خلاف فيها: مجرم خارج عن القانون
نزيدك
انت سي جوستمون، راعي للإرهاب : كيف تسيب يد خماج البوليسية يعيثون فسادا و طغيانا في أموال و أجساد و أعراض الناس بقانون الإرهاب : برة فسر للي هزوه على الشبهة و كلاه الخبط بدون ذنب، إنهم موش طاغوت
برة فسر إنه الي يمنع الناس عن بيوت الله ماهوش كافر
أنت إذا يا سي الجبان، الزفزوف، المجرم، الراعي للإرهاب، تعطي فيهم في الذرائع و تقيم على نفسك في الحجج.. ياخي ملخر، تحب تحارب الإرهاب و إلا تصنعو ؟
و بالله فسرلي الزواولة الي ما لقيتلهمش حلول، كيف تفكلهم نصبهم دون أن تعطيهم بديل، اش خليتلهم : يساسي و إلا يطلع للجبل
أما لحماية إرهاب وداد يطلع للجبل محسوب، ماهو بش يقتل زوالي كيفو، الكلها الأرقام و إحصائيات، المهم وداد تربح أكثر، طز فيه معادش عنده مورد رزق، طز فيه كان من حقده على الدولة طلع للجبل! إنت غلام وداد و وزير أول متع السمباتيك برك
مهدوش، إنت زادة أعور
120 بوليس متورطين في الإرهاب، ألف تفليمة عملتها الداخلية : كشافة ردوهم إرهاب، منزل نور ردوهم إرهاب، و القضقاضي في قائمة إغتيالاته ولد الصادق بن مهني الي ما عندوش أولاد
زيد نقابات تابعة اللطيف، باربوات، تعمل في تمردات و تتحدى في رؤسائها و تهدد في التوانسة
قبل عملية سيدي علي بن عون، الخطيب الإدريسي راسل الداخلية و أعلمهم الي فمة دار فيها جماعة ماهمش م الجهة و ماهمش سلفية، و يحضّرو في حاجة، تلفتوا الجرة و بعثتو البوليسية ياكلها الكرطوش
و إنت.. في عوض تحل عينيك في الداخلية
.. تسكر في إذاعة تعدي في القرآن! الي طلعو للجبل من قبل ما تتحل الإذاعة يا سي الأعور!
و في الختام، إنت عميل! إيه عميل، و ردها عليا إن إستطعت، هيئة لتدارس الوضع البنكي التونسي، سفير فرانسا عضو فيها ! ما قصرتش، هاذا علاش ماتت الفلاقة يا عميل! تره سفيرك عضو فاش عندهم! إنت عبد إنت، عظام الشرايطي و الجربوع تتقلب يا عميل!
نلخص، أنت جبان، زفزوف، بهيم، مجرم، أعور و عميل
و خطوطك الحمر، أعملهم لمرتك، ثمة تلاثة خطوط حمر سي الشباب : السيادة الوطنية، كرامة المواطن، و دستور الجمهورية التونسية
ما زاد عن ذلك.. بلو، و أعمل بيه إش تحب!! أمور متع سمباتيك ما نفهمش فيها هذيكا!
قبل ما ننسى.. قبل ما تبدى تنتدب في أولاد الزواولة باش ياكلهم الكرطوش، كانك راجل، هز جوارات الكورة، و مفرخ مكتوب، و ولدك، و أولاد البوشماوي و أبعث الرافل في اللاك و النصر، و الا سمباتيك هاذوكم!! ما تنجمهمش، هذوكم ما يجيش يطلع للشغامبي، وه يحكيو بالفغنسي الي يعبر خير!
دونك ريحة الرجولية ما تكسبهاش : تحب ولدي أنا يطلع للجبل يعس على ولدك، و بعد قلي أحنا شعب واحد متكاتفين، جيب ولدك يتكاتف كانك راجل! أما موضوع الرجولية مانا حسمنا فيه
ياسين بن شهيد الجيش الوطني العقيد الطاهر العياري، مسوي وضعيته مع الخدمة العسكرية من 2009 و ناشط من قبل الثورة ما خافش من بن علي و قت انت تسمع إسمه تجري تعمل بيبي، و توه تعرضلي في الدورة، و هاك القضية الي مرقدهالي ورقة ضغط، بلها و أشرب ماها، بلاد فيها موش راجل وزير أول، لابد أن يكون رجالها في السجون
قال أعظم الخلق : « إِنَّ مِنْ أَعْظَمِ الْجِهَادِ كَلِمَةَ عَدْلٍ عِنْدَ سُلْطَانٍ جَائِرٍ »
تنجم تعديني إرهاب زادة بالكليمتين هاذم ، جهاد.. جهاد و نص.
أما من سائته بذائة المقال.. لا بأس.." اغفروا لي بذائتي ولكن أروني وضعا أكثر بذاءة مما نحن فيه..."
-ياسين العياري-
ليست هناك تعليقات:
إرسال تعليق